S.T.A.L.K.E.R. 2-ის ფაილებში იპოვეს ახალი იარაღი Metro-ს სერიაზე მინიშნებით — შესაძლოა ის თამაშს პატჩებთან ერთად დაემატოს

როგორც ჩანს, S.T.A.L.K.E.R. 2: Heart of Chornobyl-ის არსენალი შესაძლოა ახალი იარაღის ნიმუშებით შეივსოს. „დატამაინერმა“ (მონაცემების მომპოვებელმა) მეტსახელად Greshnyy, თამაშის ფაილებში სტელს-რეჟიმისთვის განკუთვნილი რევოლვერის აღწერა და მახასიათებლები აღმოაჩინა — მის სახელწოდებაში კი 4A Games-ის მიერ შექმნილ Metro-ს სერიაზე მინიშნებაა.

იარაღს შემდეგი აღწერა აქვს: „ვიღაც ძალიან ეცადა, რომ ეს რევოლვერი სპეციალური, შუალედური ვაზნებისთვის გადაეკეთებინა. გაწეული ძალისხმევის შეფასება რთულია, მაგრამ შედეგი უდავოდ შთამბეჭდავია“. რევოლვერი მოდიფიცირებულია შაშხანის კალიბრზე, აღჭურვილია მაყუჩით და აქვს გამორჩეული სახელი „Тихарь“ (ქართ. „ჩუმი“) — ასე ჰქვია ხელნაკეთ შაშხანას თამაშებიდან Metro 2033, Metro: Last Light და Metro Exodus.

ყოველივე ზემოთქმულის გათვალისწინებით, ახალი იარაღი შესაძლოა შესანიშნავი არჩევანი გახდეს ფარულად თამაშის მოყვარულთათვის.