შუთერის John Carpenter’s Toxic Commando-ს პრევიუ

Saber Interactive-ის ახალი კოოპერატიული შუთერი სახელწოდებით John Carpenter's Toxic Commando ნამდვილ შეშლილ თავგადასავალს წარმოადგენს, თანაც ყველა გაგებით. gamescom-ზე გამართული დახურული ჩვენების დროს, ჟურნალისტებს საშუალება მიეცათ, ერთი საათის განმავლობაში ეთამაშათ შუთერი სამ სხვა მოთამაშესთან ერთად. ამ დროის განმავლობაში მათ გადაუარათ სატვირთო მანქანამ, გაიტაცა უზარმაზარმა მონსტრმა, იმოძრავეს მონსტრებით სავსე რუკაზე და პარალელურად, მდევრებს იგერიებდნენ.

Toxic Commando მიზნად ისახავს 80-იანი წლების ბოლოსა და 90-იანი წლების დასაწყისის შეშლილი „ბოევიკების“ ატმოსფეროს გადმოცემას. Saber Interactive-ის დეველოპერები თამაშის სიუჟეტზე მუშაობისას ლეგენდარულ ჯონ კარპენტერთან, ფილმების „გაქცევა ნიუ-იორკიდან“ და „რაღაც“ რეჟისორთან, თანამშრომლობდნენ. მოვლენები უახლოეს მომავალში ვითარდება, სადაც დედამიწის ბირთვის ენერგიის გამოყენების ექსპერიმენტი ათავისუფლებს უძველეს არსებას, რომელიც ცნობილია როგორც „ლორწოს ღმერთი“. მოთამაშეები დაქირავებული მებრძოლების როლს ირგებენ, რომლებმაც პლანეტა მონსტრებისგან იარაღის ფართო არსენალის დახმარებით უნდა გადაარჩინონ.

ჩვენ არ შეგვიძლია კონკრეტული ფილმების ლიცენზირება, მაგრამ თამაშში არის გარკვეული მინიშნებები, „ფასქეგები“ და ელემენტები, რომლებიც შესანიშნავად ერწყმის კარპენტერის მიერ განდიდებულ სამყაროს და მის ატმოსფეროს გადმოსცემს.

ტიმ უილიტსი, Saber Interactive-ის მთავარი კრეატიული დირექტორი

ჟურნალისტები ძალიან აქებენ ატმოსფეროს. უზარმაზარი რუკა სავსე იყო მწვანე ლორწოს ორმოებითა და მანათობელი საცეცებით, რომლებიც უყურადღებო მოთამაშეებს სცემდნენ. ზომბების ბრბოები თითქოს თავად ითხოვდნენ ყუმბარებით დაწვას, ხოლო სუპერმენის მტრის – დუმსდეის მსგავსი საზარელი, ეკლებიანი არსებები პერსონაჟებს იტაცებდნენ და მიათრევდნენ.

უილიტსმა აღნიშნა, რომ Toxic Commando-ზე მუშაობამ Saber-ს არსებების დიზაინში უფრო მეტი შემოქმედებითი თავისუფლება მისცა, ვიდრე ლიცენზირებულ პროექტებს.

World War Z-ში ჩვენ ადამიან-ზომბებით ვართ შეზღუდულები, ხოლო Space Marine-ში – ტირანიდებით. აქ კი მხოლოდ ჩვენი ფანტაზია გვზღუდავს. ჩვენთან ნამდვილი შეშლილი არსებები დარბიან.

Saber-მა ორივე ხსენებული თამაშის გამოცდილება გამოიყენა მტრების ურდოებთან მუშაობისას, რაც აშკარად ჩანს Toxic Commando-ში. თამაში მუდმივად ინარჩუნებს დაძაბულობას, უშვებს რა მოთამაშეებზე უკვდავების უზარმაზარ ლაშქარს, რომელთა განადგურება მოლოტოვის კოქტეილებით, „რეილგანებით“, ტყვიამფრქვევის კოშკურებითა და სხვა მძიმე შეიარაღებითაა საჭირო.

მომხმარებლებს ასევე მოუწევთ სპეციალური უნარების ოსტატურად გამოყენება. შეგიძლიათ ითამაშოთ „ტანკის“ კლასით, რომელსაც პერიოდულად აქტივირებადი უნარი აქვს და ახლომდებარე ყველა მოკავშირეს მიღებულ ზიანს უმცირებს. „ჰილერს“ მსგავსი უნარი აქვს, რომელიც გარკვეულ რადიუსში დროებით სიცოცხლის ქულებს იძლევა, რაც ერთად ყოფნის მნიშვნელობას უსვამდა ხაზს. უილიტსმა დაამატა, რომ თითოეულ კლასს აქვს გაუმჯობესების ღრმა ხეები, რომლებიც World War Z-ისა და Space Marine-ის სისტემებს ეფუძნება.

Toxic Commando ცხრა რუკით გამოვა, რომელთაგან თითოეული იმდენად დიდია, რომ მათზე გადაადგილება ტრანსპორტით ჯობს. თამაშის ამ ნაწილსაც ძალიან აქებენ: აქ არის სატვირთო მანქანები, სასწრაფო დახმარების მანქანა, მხარდაჭერის მანქანა და მრავალი სხვა.